ZOURNAL DÉMALIZ I INFORM AZOT DOSI KOLÈR SOSIAL SIKOTÉ MADAGASCAR

Parkoman larivé 

Dopi lo 25 sètanm lan 2025, in kolèr sosial la pété dann Madagaskar, akoz i fé in boutan néna koupir dolo, kouran i fé kan la pli i tonb pi tro i poz problimn po fé tourn bann mashine kouran é anplis i tomb an pane souvan i fé ''JIRAMA'' i okip distribision dolo èk kouran i mèt anplas bann koupir programé é kom néna in domann for té giny pi asiré, kom té tro souvan, bann sitwayin la mont zot kolèr kont zot gouvèrnnman é zot té domand trouv in mwayin po arèt bann koupir là, forstan pa ékout azot la fini par in gran kolèr sosial in pé partou dann shomin, la fini par dérapé bonpé piyaz, é magasin détruir é néna bann mor é blésé in pé partou dan lo péi. Avèk astèr bonpé rovandikasion sosial. 

Kont lo pouwar la zénès la di arèt èk la koripsion, la mizèr

Anfas lo pouwar olièrk rouv in kozé èk zot la profèr itiliz la réprésion ke la fé mont ankor plis la kolèr la popilasion, lo prézidan malgash la fini par fé démisione son gouvèrnmman, i fé in boutan  mouvman la zénès ke lé aktiv dosi rézo sosio, po dénons malizé sosial dan zot péi. dann zot rovandikasion i domann astèr osi lo dépar lo prézidan po linstan li tyinbo son pouwar, dapré i di sominn prosinn i kont mèt anplas in nouvo gouvèrnman, li di la port lé rouvèr po tout sat i vé travay po lo péi, mé lo mouvman ke lé an tèt dovan anméné par  « Gen Z Madagascar »  i domann astèr li kit lo pouwar, po linstan li tyinbo tèt.

Kolèr lo pèp i kontini

Ziska zordi lo rapor fors i kontini èk lo pouwar é bann manifèstan kisa wa sort vinkèr é koman i sa fini fodra suiv laktialité po konèt lévolision la sitiasion. 

Sat lé sir fo pa lo péi i tonb dan in gro malizé é i trouv in lantant po pa Madagaskar i koné plis ankor in grav kriz kiswa politik, sosial, ékonomi, pars lé sat lé pov sra bann promié viktim. 

Fotaspéré trankilité i rovien vitman, é bann malagash mizèr i trouv in mèyèr kondision vi po domin po avansé.

Madagaskar dopi son lindépandans lé malizé po fé dékol son dévlopman

Dopi son lindépandans lo 26 zuin 1960, Madagaskar i mank in stabilité solid po giny fé son dévlopman komkifo dan tout domène po lo byin viv bann malagash, tank i trouv arpa stabilité-là sra pas fasil po sortir dann gran malizé lé dodan zordi, pourtan bann rosours i mank pa zot, lé la koripsion, mové gouvèrnans, lanprofitaz dan la min inndé trwa, i maliz tout. 

Lé lo pèp malgash mèt anplas in lékip i vé lo byin nèt son popilasion, la violans, la réprésion lapa in solision tout sera pèrdan si zot i kontinié pa awar in lantant politikman, sosialman antzot po tir zot péi dan la mizèr é la kriz.

Zournal Démaliz  la éklèr azot in pé dosi sistiasion parkoté Madagaskar, lapa la po fé lo konésèr é ou rod po fé lo komandèr ou dénig zot malizé, li done son pwindvizé, lé lo pèp Malgash war kosa lé bon po zot domin. 

Parkont néna inndé média kolonial isi Larénion i arèt pa larg zot manzé gaté dosi sitiasion Madagaskar.

Po linstan bann domoun i kontinié manifèsté Zournal Démaliz wa tyinbo azot informé dosi  la sitiasion. Tyinbo lo pèp Madagaskar.

Po konèt : Kopiaz roprodiksion intèrdi. 

Si zot i ropran mon lartik po fé konèt oubli pa di ousa i sort mi kont si zot.

Paz Facebook Zournal Démaliz : https://www.facebook.com/people/Zournal-D%C3%A9maliz/61581196884534/

Rédaksion Zournal Démaliz