LO MILIÉ KILTIRÈL LÉ DIVIZÉ

 PO KONÈT : ZARTIK TÉ FINE DIFIZÉ DOPI AVAN DOSI LANSIEN SIT DÉMALIZ ASTÈR ARTROUV DOSI NOUVO SIT ZOURNAL DÉMALIZ MÉ LÉ TOUZOUR DAN TAN... 

Dann zané 1970/1980 minm in pé avan, bann militan kiltirèl é mizisien dan zot konba lavé pa pèr dénons bann politik kiltirèl kolonialis dan zot lit, épisa té kour pa dèryèr zot po fé lo mandian po giny in koudmin larzan, navé in solidarité po zot lorganizasion té done la min minm si té dir. 

Zordi tousala la sanzé po zot avansé la plipar la rant dan lo gob sibvansion ou fé kamarad èk in kan politikèr po giny kontra é larzan, la di vodrémié vann zot lam fé pi dézord dénons pi lo sistèm kolonial po giny larzan sibvansion é kontra. 

Sé posa koméla lo batay kiltirèl lé divizé, i avans pi i giny pi transmèt bann zénérasion i lèv tout lo batay kiltirèl lé farfouyé, lé divizé, na pi lalit, i sifi rogard avan kan bann group maloya té dénons bann politikèr é lo sistèm dan zot bann tèks lavé pa pèr tan la fini si na ankor in ti rézistans mé lé fay. 

Koméla si ou vé giny sibvansion po sort in mizik ou mèt dobout in prozé fo ou lé kosté èk in parti politik é dan ou bann tèks é prozé fo pa ou moukat azot ou dénons lo sistèm kolonial, pa bézwin lo zié lé bousé la plipar lamizik koméla lé folklorizé é bann manifèstasion kiltirèl fransizé, lo bann tèks na okin travay lé fé dosi i shant ninport kosa, lé rar koméla ou wa antann bann tèks angazé ou zoli romans kom avan lé vré na pwin in volonté politik kiltirèl po mèt anplas bann zatélié lékritir lamizik po ke sat néna lo gouté posa i transmé bann zéne i fé i fé ke astèr i sant tout kalité la kouyonis. 

Zordi nou wa minm sa té démons lo sistèm kolonial la fine rant dann ron la fini lo solidarité na pi, bann politikèr la diviz la tié lo milié kiltirèl. Pé tèt in zour wa giny romèt dobout lo batay kiltirèl po di arèt èksa mé po linstan sakinn i roul son koté…

Paz Facebook Zournal Démaliz : https://www.facebook.com/people/Zournal-D%C3%A9maliz/61581196884534/

Po konèt : Kopiaz roprodiksion intèrdi. 

Si zot i ropran lartik po fé konèt oubli pa di ousa i sort  i kont si zot.

Rédaksion Zournal Démaliz