LÉTAN ARASH NOUT LIBÈRTÉ PO KAS LA SHÈNE KOLONIAL PODVRÉ

SÉTANÉ NÉNA 177 ZANÉ LÈSKLAVAZ TÉ ABOLI DANN PÉI LARÉNION

Lané 2025 i mark lo 177 tièm anivèrsèr labolision lèsklavaz dan bann koloni fransé. 

Isi Larénion lé lo 20 désanm in dat swazi par kolonialis fransé kan la désid fé labolision lèsklavaz. po aranz zot sistèm kolonial.

Bann Rénioné wa rann omaz zot zansèt la sobat é lité po zot libèrté kont lo sistèm ésklavazis, pli gran krim kont limanité, in paz nwar nout listwar ke tout bann rénioné i dwa pa oubliyé é rann omaz bann nwar maron.

20 désanm lé gayar fé kabar, mé lé inportan fé in rokèyman po lo martir bann zansèt nwar maron la sibi dan lo pèpléman Larénion, zot lapa domann i déport azot si in ti bout latèr dann milyé Loséan Indien ousa zordi la fé Larénion tout koulèr…

Plis zamé nou dwa kontinié alim flanbo bann maronèr la done anou po kontinié lalit dan tout nout drwa po tras in vré shomin la libèrté…

LIBÈR 20 DÉSANM DAN LAMIN BANN MÈRI KOLONIAL

Toulézan sak fin lané po souvnans labolision lèsklavaz désidé par bann komandèr kolonialis lépok i fé lafèt in pé partou po rann omaz bann zansèt nwar maron koméla lé bann mèr i organiz tousala dan zot manièr maziné koman fèt sa, lé touzour bann départmantalis 974, i tyinbo larné vin désanm alor kansala bann kont- départmantalis, kontkolonial, i dobout po in gran fèt i anons nout libérasion nasional po in vré libèrté. 

KÈL LIBÈRTÉ ?

Vin désanm in dat bann kolonialis la donn anou po souvnans nout bann zansèt té zèsklav sistèm ésklavazis kolonialis dann komansman pèpléman Larénion la souk azot sikoté Lafrik, Madégaskar po fé azot zèsklav si tibout latèr-là lafé Larénion zordi séposa vin désanm fo apèl ali Fèt Kaf souvnans po bann nwar maron sé zot la giny kout sabouk èk bann zèsklavazis gro blan (bann gro blan té bann domoun rasis na pwin lo kèr po lé zot koulèr lé in ras té vé komand limanité po zot profi) 177 tan apré Larénion lapa sort dann sékèl é na pi ropèr sé posa koméla nout sosiété i viv dan la violans, dan lapèr é lé bann matriz kaf zésklav zansèt lé plis bordé dann nout péi na pwin riyin léfé po rann azot omaz, réparasion, kontrèr sé bann zansien zèsklavazis lé mi an valèr kiswa èk bann stati, non somin é dot... 

Séposa dat vin désanm swazi par bann komandèr kolonial lé ankor in dat po kouyonialis anou zordi i di anou fo zwé maloya mé néna in travay mémwar nout bann zéne i lèv po fé konèt kosa lété sistèm ésklavazis na ankor sobatkozé po di si in krim kont limanité kaf rénioné té viktim par bann zèsklavazis si labolision kout sabouk la fini lèsklavaz modern lé ankor-là lé in lit pli dir po lité po abolir tout sat i anpès anou avansé po èt lib podvréman.

Gayar Fèt Kaf Pèp Rénioné.

Po konèt : Kopiaz roprodiksion intèrdi. 

Si zot i partaz lartik po fé konèt oubli pa di ousa i sort i kont si zot.

Paz Facebook Zournal Démaliz : https://www.facebook.com/people/Zournal-D%C3%A9maliz/61581196884534/

Rédaksion Zournal Démaliz