FO ROPRANN NOUT LÈSPAS SA LÉ ANOU

Po konèt : Zartik té finé difizé dopi avan dosi lansien sit Démaliz astèr artrouv dosi nouvo sit Zournal Démaliz mé lé touzour dan tan...

Sé pa fo nou ranfèrm anou si nou minm, mé forstan nou la lès bann kolonialis akapar nout péi i fé zordi zot la fine mèt la min dosi tout zafèr dan nout péi é avèk konplisité bann rénioné vandèrki ke la favoriz zot lantré isi, gard zot minm zordi nout bordmèr, la mèr, la ravine, la rivièr, lé zèr, la montane tout lo bann zaktivité touristik é plézir lamizman lé dan la min domoun i sort andéor forstan rénioné la pi fé in kont avèk zot péi, bana la mèt lo grapin dosi mé lé vré po zot lé pli fasil giny lotorizasion pars kan sé lo rénioné i domand i fé tout po intèrdi é dékouraz ali i fo di osi kan zot i débark zot néna déza la konésans lo bann pratik so bann zaktivité-là. So bann pratik bann zaktivité zot la mèt anplas sra sat néna mwayin wa giny fé pars aou ti kolon bitasion, travayèr batiman ou poura zamé fé ou anvoy out marmay pars na pwin lé oblizé ral si gongon la mizèr. 

Akoz bann sat i diriz nout péi i mèt pa anplas in formasion po form bann rénioné isi apré po pran anmin so bann zaktivité touristik é plézir lamizman dan in bon lorganizasion anméné par bann rénioné isi po prann sa an min noré pi fénésans bann vré travay é arèt domann souplé bann Mèr ti kontra la mizèr. 

Oté Rénioné létan roprann anou anmin po diriz nout péi po roprann nout lèspas i apartien anou é giny travay dan nout péi.

Po konèt : Kopiaz roprodiksion intèrdi. 

Si zot i ropran lartik po fé konèt oubli pa di ousa i sort i kont si zot.

Rédaksion Zournal Démaliz